Gaur, apirilak 21, ostiralarekin, Guggenheim Bilbao eta New York Museoek martxan jarri dute Euskal Autonomia Erkidegoko bi artista New Yorkera joateko programaren hirugarren edizioa; egonaldiak datorren urrian egingo dira. Izena emateko epea gaur bertan zabaldu, eta datorren maiatzaren 24a arte luzatuko da. Egonaldien lehenengo edizioan Alain Urrutia eta Carla Tobar izan ziren hautatutako artistak; bigarrenean, aldiz, Diego Vivanco eta Cristian Villavicencio.
Proiektu horri esker, EAEko artista hasiberri bik aukera izango dute lau astez New Yorken bizitzeko, hiriko arte-giroaz blaitu eta haien xede eta gaitasunak garatzeko helburuarekin. Denbora epe horretan, hautatutako pertsonek artista, komisario eta arte-erakundeen esperientzia ezagutu ahalko dute, New Yorkeko Guggenheim Museoko profesionalen eskutik. Artista bakoitzari 2.500 dolar esleituko zaizkio, haien egonaldirako.
Artista hasiberrientzako egonaldi-programa nahiz ikasleentzako beka-programa Guggenheim Bilbao Museoak eta Solomon R. Guggenheim Foundation erakundeak 2014ko abenduan sinatu zuten Kudeaketa Akordioaren berrikuntzaren baitan jasota daude; berritze horrek bi instituzioen arteko lankidetzan sakontzen du, proiektu berrien bitartez.
Datorren maiatzaren 24 arte, interesdunek oinarriak kontsultatu eta izena eman dezakete hemen: https://www.guggenheim-bilbao.