GUGGENHEIM BILBAO MUSEOAK 956.417 BISITARI IZAN ZITUEN 2010. URTEAN
Iaz bisitarien kopurua 2009. urtean baino % 6 gehiago izan zen
Guggenheim Bilbao Museoak 956.417 bisitari erakarri zituen 2010ean, 2009an baino ia % 6 gehiago; gainditu egin da, hortaz, aurrez ikusitako bisitarien kopurua mundu osoko egoera ekonomiko zail honetan, eta, hargatik, emaitza oso onen aurrean gaudela jo dezakegu.
Bisitarien jatorriari dagokienez, azpimarratzekoa da 2010ean 2 puntutan gora egin zuela atzerritarren kopuruak: guztien % 62 izan ziren, besteak beste, Frantziatik, Erresuma Batutik eta AEBtik hurbildu zirenak. Estatuko bisitariak % 25 eta EAEkoak % 13 izan ziren, aurreko urteetako kopuru bertsua beraz. Nabarmentzekoa da, Holandako eta Flandeseko Urrezko Aroko pinturari eskainitako erakusketa dela eta, tokiko bisitari gehiago izan zirela urtearen azken hiruhilekoan, hain zuzen, aurreko ekitaldian baino % 11,4 gehiago, hau da, guztien % 26,7.