GUGGENHEIM BILBAO MUSEOAK BIHAR EGINGO DIE HARRERA BILBOKO VII. ARTE ETA KULTURA TOPAKETEI

Guggenheim Bilbao Museoa bigarren jarraiko urtez izango da Bilboko VII. Arte eta Kultura Topaketen egoitza. Topaketa hauek, Euskal Herriko Unibertsitatearekin lankidetzan antolatzen dira.

Erantzukizun eta sentsibilitate partekatua artearen interpretazioan eta hezkuntzan izango da Guggenheim Bilbao Museoak eta Arte Eder Fakultateak antolatutako ikastaro honen gaia, eta BBK-ren babesa du.

Ikastaroa hiru egunetan zehar egingo da Guggenheim Bilbao Museoko Entzungelan, eta bertan izango dira artearen eta artearen hezkuntzaren arloko hainbat pertsona garrantzitsu; Tony Bennett soziologo ingelesa arte galeriek hiriko mekanismo bezala duten zereginaz mintzatuko da; Richard Deacon artistak arte garaikideari buruz duen ikuspegia azalduko du, Elefante bat ontzitegi batean? izenburu iradokitzailearekin; Sarah Peters, Minneápoliseko Walker Art Center-en publiko orokorrarentzako programen zuzendari laguntzailea, arteari eta gizarte-konpromisoari buruz arituko da.

Ikastaroa hiru saiotan egituratuta dago: bihar, asteazkena, hizlariek praktika artistikoak eta museoen eginkizuna izango dituzte hizpide; arratsaldean, Maider López eta Geoff Lowe artistek euren sortze-prozesuari buruzko tailer teoriko-praktiko bi eskainiko dituzte; ostegunean, museoetako hezitzaileek Museoaren eginkizuna zein den azalduko dute, artelanaren eta publikoaren bitartekari bezala. Ostiralean, museoetako, Unibertsitateetako eta beste arte erakunde batzuetako profesionalak mintzaldi desberdinetan arituko dira artisten eta arte hezitzaileen arteko harreman, hurbilketa eta distantziei buruz.

Bilboko VII. Arte eta Kultura Topaketen hezkuntza egitaraua bihar, goizeko 9:00etan, hasiko da. Ikastaroa honakoek aurkeztuko dute: Juan Ignacio Vidarte Guggenheim Bilbao Museoko zuzendariak, Jon Mancisidor BBK-ko zuzendariorde nagusiak eta Iñaki Goiricelayak, Euskal Herriko Unibertsitatearen Bizkaiko Campuseko zuzendariordeak.

Bilbon, 2006ko ekainaren 27an